Carito Ni Bulu Lomang

Carito ni Bulu Lomang

Mungkin nadong be hita naso mananda bulu lomang, dibaen dongan parmasak ni sipulut, leng jenis ni bulu doon. Adong najeges nai ibaen halak manjadi suling, diapusi, dirawat, di umma ganop tokkin. 

Lain buse attong carito ni bulu lomang, dodas doon ibaen halak uti utian. Molo songon na hurang jeges ma saba i, diottang mai koum na dua tolu anso mangalomang. Leng marmaksud martujuan mada, dalan mangido tu Namar Kuaso i. Anso dao bala donok parsaulian, leng mandapot ma saba pambaenan. Marrasoki sudena pinoppar, lopas balanjo sikola niganak.

Mulak majolo hita tu carito ni bulu lomang. Biasona dipili ma bulu na jeges nai, inda pola natobang, inda pola naposo, attara ma pandokkon na.  Leng akkon gupak, sangape raut na tajom ma pakkorotna so jeges panggotap nai. Dibuat ma bulu nai, sacukup ni sipulut nagiot baenon lomang. Buse ulang pola nagodang godang tu, ulang buse attong menek menek, hira hira sabitis ni daganak na mar umur 3-4 taon ma pargodang na.

Dung dapot bulu on, di paluhut ma buse hasaya nagiot baenon lomang. Dahanon sipulut, dahonon nalambok, boti uskus uap na. Pati, sa cukup na. Go dapot leng tobang mada harambir nai anso marmiyak lomang nai dung masak. Bulung ni pisang, naum poso dipilian mai, anso dibaen panyaput ni lomang di bagasan ni bolu parmasakan.  Sira leng dibaen mai saotik, anso leng mardai atcim nai. 

Malengkap sudena, dipagara ma api. Maradaran hayu namata, ulang mosok. Sonnari  bosi doma dibaen halak, anso leng umtahan ia, inda mabiar iba mosok hayu adaran na. 

Dipamasuk ma dahanon sipulut, pati, tubagasan ni bulu.  Di pente ma sampe masak baru marguar lomang on. Api na pe leng ijago ma, ulang sanga mosok bulu, ulang sanga meltak inda masak lomang. Ipadangit anso leng umjeges parmasak na. 

Dung masak lomang, dibuat busema gupak sanga pe raut. Ibola ma bulu lomang, ipakaluar ma isina. Di gotap gotap ma menek menek, hatia milas milas di surduhon ma tu koum nadapotan rasoki. Sude marjop ni roha, mandai lomang nadung masak, mardongan ihan naitutung, mardongan tarutung, mardongan rondang, gulo sasuai selera ma. 

Bulu nadung mosok, sanga pe bulung nadung malos, di paluhut ma mulai, diambukkon ma tu parapian, anso ulang manjadi sarop, sanga pe roppak. Nadi ingot be bulu, nadi apus, dibasu, di balut dohot bulung nipisang nakkininan.  Madung lalu maksud dohot tujuan ni anak boru namarmasak lomang.  Na porlu be, bulu namarrittop, sanga pe bulu naumjeges. 

Bulu ma namosok, bulu ma dilambung ni api, bulu ma nai bola bola. Baru di ambungkon tu tempat sampah. Manjadi barang naso marguna, saotik pe inda idokkon jasa baik ni bulu nadung marmasak lomang. 

Saima carito ni bulu lomang, jadi iktibar dihita. Anso ulang lupa dihalak namarjasa di ngolutta, tarutamo Damang soni dainang niba. Go na haran ni damang dainang namanjadi halak iba. Go na haran ni damang dainang inda bisa iba jadi sarjana dll. Soni juo attong halak nalain namarjasa di ngolutta, guru gurutta, dongan dongan ta. Sudena ma, ulang ro ib songon nai dokkon ni pepatah i. "LUPA KACANG TU KULITNA NA" 

Guru Alif Alif